داهمني الشيب والصمت استباح الكلام
واخر قبيلة من احلامي تشد الرحال

العمر لحظة وتمضي لو نعيش الف عام
نبني ونهدم ونسبح في بحور الخيال


اغصان فكري قصائد والقوافي حمام
واكبر طموحاتي اكسر هيبة الارتجال


انا كذا كلما شقيت صدر الظلام
ارسم لعشقي هدف واصنع لشمسي ظلال


ربيع عمري بدا والا انتهى ما يلام
مسافة الصمت يدنيها حدود الزوال


سلام والا بلاش من الحكي والسلام
احاول اجسد الواقع بدون انفعال


يا تجربة فكري المسكون بالانتقام
تجاوز الواقع افضل من وقوع الجدال


احيان الانسان يعشق فكرة الانهزام
واحيان يكسر صراخ القيد صوت القتال


واحيان خف القلم ينزع شداد الحسام
واحيان يسبق جمال العشق عشق الجمال


تعبت اشد الحزام بضرب تحت الحزام
في ساحة اسوارها صفق وصراخ وهبال


تعبت اراجع حكاياتي قبل لانام
تعبت من جلد ذاتي في بعض ما يقال


كذبت من قالوا ان الغيث دمع الغمام
وصدقت من قالوا ان الكذب ملح الرجال


الفقر والهم تقتل كثرة الاهتمام
والمال ما يخدم اللي شيمته راس مال


متناقضات وشتات وفوضوية ظلام
تشعرني اني لحالي والبقية لحال


ما كل كبوة جواد تعزز الاحترام
شوف السكاكين ما ترحم سقوط الجمال


يا راعي البكرة الوضحى ترى الدرب شام
خذني معك قبل تكسير النصال النصال


انا الذي ما تغطيني غصون الثمام
وانا الذي ما تفييني متون الجبال


يعني متى ما انكشف راسي وطاح اللثام
ما عاد لي حاجة اشي بشت والا عقال


كل الفتاوى تهون الا حالا الحرام
وكل المصايب تهون الا حرام الحلال


الواقع اكبر من الخذلان والاتهام
والصبر مقفول بابه بالضنون الثقال


نظام يقتل شعوب وشعب يقتل نظام
وما بين هذا وذاك الضن والاحتمال


لا تنحني للعواصف يا رفيع المقام
ما تكسر العاصفة غر الغصون الطوال


اصدع بما تعرف انه حق يا ابن الامام
في وجه من يخلط الارهاب بالاعتدال


لا خير في الحاكم اللي ما يصون الذمام
ولا خير في القايد اللي ما يجيد النزال


ما دام بيديك للاسلام ذروة سنام
الترك والصد يعطي للهلال اكتمال


فصل الامور العظيمة للرجال العظام
والتضحية واجبة قبل اكتمال الهلال


لعلها تنتهي وتصير مسك الختام
على يدين آل وايل دون ال وال


على يدين الكريم الشامخ ابن الكرام
اللي ليا ساقها انساقت على كل حال


الطرق يا قايد الامة يفك اللحام
الا التحام الصفوف اللي ما يترك مجال


وانا هنا بسم ربعي ربعي اهل المقام
ربعي هل المجد والشيمة وفصل المقال


ربعي بني مالك اللي مجدهم ما يرام
ما هو قريب المنال إلاّ بعيد المنال


أهل الكرم والشجاعة والرجال الكرام
رجال يضرب بهم في كل موقف مثال


من التهم للحجاز وما الحجز للتهام
ما فيهم إلاّ الرجال مجمّلين الرجال


وشيوخنا للوفاء والعزّ ذروة سنام
سادة وقادة للأبطال وجمال وكمال


يا سعود جينا وفود على وعد وإلتزام
بالوعد والوعد عهد لطيّبين الفعال


بني عفيف الرجال مطوّعين الخصام
والشيخ رحمان فارسهم ليوم النزال


شيخٌ ولد شيخ تسلم يا رفيع المقام
يا صقر سيهان يرقى فوق روس الجبال


وختامها مني ومن هالرجال الكرام
تحية إجلال وإكبار لوجيه الرجال