طبعا أنا مع كل اللى قال إن الحب مش تسبيل و مسكة إيد على الكورنيش وسنيمات وكافيهات , ولا برضه بنت شفتها فى الجامعة و عجبتنى واتعرفت عليها , ومشينا مع بعض شوية !
كل الكلام دة جميـــل , وأحاسيس تستحق التقدير , بس للأسف الأفلام و الأغانى هى اللى وصلت لنا إن هو دة الحب , مع إن دى هى المرحلة الأولى بس , ومن وجهة نظرى المتواضعة , الحب اللى بجد يعدى بتلات مراحل :
المرحلة الاولى : الإعجاب و الانبهار , و دى بتبقى فيهاالمشاعر الفياضة و تشوفى حبيبك ملاك وكأنه ( كامل كمال الكامل ) , ودى المرحلة اللى بتركز عليها الافلام و الأغانى قوى , لأنها غالبابتبقى أجمل مرحلة بتعيشها .
المرحلة التانية : أكتشاف العيوب , وفى المرحلة دى بيبدأ كل واحد يكتشف عيوب التانى , و تبتدى صورت الملاك تختفى , و تحل محلها صورة الأنسان .. بس رغم أكتشاف العيوب حبيبك , لسة بتحبه ولســة متمسك بيه , فإذا وصلت لمرحلة إنك شايف عيوب حبيبك وفى نفس الوقت لسة بتحبه , فإنت كدة ماشى فى السكة الصح .
المرحلة الثالثة : التعايش مع حبيبك بمزاياه و عيوبه , و فى المرحلة دى , إنت اكتشفت عيوبه خلاص , و ابتديت تتأقلم و تعيش معاها , وتشوفه من زوايا تانية خالص , ماكنتش واخد بالك منها .. وفى حالة وصولك للمرحلة دى , تبقى فى علاقة حب حقيقى .. و هو دة أيوة دة .. الحب الحقيقى .
وعلى العموم لسه الرأى المهم والأهم وهو رأيكم أنتم فكيف فى رأيكم يكون الحب!!